Uko Jeneral’ Obed Ngabo yishwe na M23

Uwiyitaga Jenerali Obedi Ngabo wo mu ihuriro Coalition Libérale pour la Démocratie (CLD) riri mu yagize imitwe ya Wazalendo ifasha ingabo za Leta ya Repubulika Iharanira Demokarasi ya Congo mu ntambara irwanamo na AFC/M23, yishwe n’ingabo z’uriya mutwe.

Amakuru aturuka mu burasirazuba bwa Congo avuga ko Ngabo Obed yabonetse yapfuye ku wa Gatanu tariki ya 22 Gicurasi 2026.

Urupfu rw’uyu mugabo rwemejwe n’abarimo Guverineri wungirije w’Intara ya Kivu y’Amajyaruguru ku ruhande rwa AFC/M23, Ngarambe Manzi Willy.

Uyu ku rubuga rwe rwa X, yashinje uriya murwanyi kuba mu minsi ibiri ishize yari yatwitse ingo z’abaturage bo mu burasirazuba bwa Congo, mbere yo gupfa.

Ati: “Mu minsi ibiri ishize yatwitse ingo z’abaturage, hanyuma uyu munsi Isi ni ahantu heza hatari uwiyita Jenerali Obed. Yasanze Ruhinda (Rugayamikore wahoze akuriye special force ya FDLR), Mudacumura [Sylivestre] wahoze ari umuyobozi wa FDLR-FOCA, Cirimwami [Peter Nkuba] wahoze ari Guverineri wa gisirikare wa Kivu y’Amajyaruguru, n’abandi.

Amakuru avuga ko Obed Ngabo yiciwe mu mirwano yabereye hafi y’agace ka Rubaya, muri Teritwari ya Masisi.